ഉള്ളൂരിൽ മിൽമ ബൂത്തിൽ കവർച്ച

ഉള്ളൂർ: മെഡിക്കൽ കോളേജ് ജംഗ്ഷനിൽ പൊലിസ് സ്റ്റേഷനു സമീപത്തെ മിൽമ ബൂത്തിൽ മോഷണം. ബൂത്ത് കുത്തിത്തുറന്ന് മേശയിലുണ്ടായിരുന്ന 60,000 രൂപ കവർന്നു. മെഡിക്കൽ കോളേജ് ജയ്‌ നഗർ പ്രിയങ്ക ഭവനിൽ സോമശേഖരന്റെ ഉടമസ്ഥതയിലുള്ള 50-ാം നമ്പർ ബൂത്തിലായിരുന്നു സംഭവം. ചൊവ്വാഴ്ച രാത്രിയിലാണ് മോഷണം നടന്നത്. ഇന്നലെ രാവിലെ കട തുറക്കുവാൻ എത്തിയപ്പോഴാണ് കവർച്ച നടന്ന വിവരം അറിയുന്നത്. പിൻവശത്തുകൂടെ എത്തി കടയുടെ ഇടതുവശത്തെ ഇരുമ്പ് ഗ്രിൽ കമ്പി ഉപയോഗിച്ച് വളച്ച് അകത്ത് കയറുകയായിരുന്നു. തുടർന്ന് കടയുടെ ഷട്ടർ പൊളിച്ച് അകത്ത് കയറിയശേഷം മേശ തകർത്താണ് പണം കവർന്നത്. കടയിൽ സി.സി ടിവി സ്ഥാപിച്ചിരുന്നെങ്കിലും മോഷണം നടക്കുമ്പോൾ പ്രവർത്തിച്ചിരുന്നില്ല. വിരലടയാള വിദഗ്ദ്ധർ സ്ഥലത്തെത്തി തെളിവുകൾ ശേഖരിച്ചു. സമീപത്തെ വ്യാപാര സ്ഥാപനങ്ങളിലെയും ബാങ്കിലെ എ.ടി.എമ്മിന് സമീപം സ്ഥാപിച്ചിട്ടുള്ള സി.സി ടിവി ദൃശ്യങ്ങൾ പൊലീസ് ശേഖരിച്ചിട്ടുണ്ട്