പാര്‍വതി തിരുവോത്ത് സംവിധായികയാവുന്നു.
ഈ വര്‍ഷം പാര്‍വതി സംവിധായികയുടെ കുപ്പായം അണിയുമെന്നാണ് സൂചന. സംവിധാനം പഠിക്കാന്‍ താരം അടുത്ത മാസം യു.എസിലേക്ക് പോവും. രണ്ടുമാസത്തെ കോഴ്സാണ്. തത്കാലം പുതിയ പ്രോജക്ടുകള്‍ സ്വീകരിക്കുന്നില്ല. ഒരു നവാഗത സംവിധായകന്റെ ഉള്‍പ്പടെ മൂന്നു പ്രോജക്ടുകളില്‍നിന്ന് താരം പിന്‍മാറിയതായാണ് വിവരം. ഈ ചിത്രങ്ങളിലേക്ക് മറ്റു നായികമാരെ പരിഗണിക്കുന്നുണ്ട്. സംവിധാനം ചെയ്യുന്ന ആദ്യ സിനിമയില്‍ മലയാളത്തിലെ ഒരു യുവനടന്‍ പ്രധാന വേഷത്തില്‍ എത്തുന്നുവെന്നാണ് സൂചന. ശക്തമായ ഒരു പ്രമേയമാണ് ചിത്രത്തിന്റേത്. പോയവര്‍ഷം വൈറസ് , ഉയരെ എന്നീ ചിത്രങ്ങളിലാണ് പാര്‍വതി അഭിനയിച്ചത്. എന്ന് നിന്റെ മൊയ് തീന്‍, ചാര്‍ളി, ടേക്ക് ഒഫ് , ബാംഗ്ളൂര്‍ ഡെയ്സ് എന്നിവയാണ് പാര്‍വതി അഭിനയിച്ച പ്രശസ്തമായ ചിത്രങ്ങള്‍. നോട്ട് ബുക്ക് എന്ന ചിത്രമാണ് പാര്‍വതിയെ ശ്രദ്ധേയാക്കിയത്. നടി എന്നതിനേക്കാളുപരി സാമൂഹ്യ വിഷയങ്ങളിലും കൃത്യമായി ഇടപെടാറുണ്ട് പാര്‍വതി. ഈ വര്‍ഷം ഒരു തമിഴ് സിനിമയുടെ ഭാഗമാവുന്നുണ്ട് പാര്‍വതി. അതേസമയം സിദ്ധാര്‍ത്ഥ് ശിവയുടെ വര്‍ത്തമാനം, വേണുവിന്റെ രാച്ചിയമ്മ, അതിഥി വേഷത്തില്‍ എത്തുന്ന ഹലാല്‍ ലവ് സ്റ്റോറി എന്നിവയാണ് പാര്‍വതി പൂര്‍ത്തിയാക്കിയ ചിത്രങ്ങള്‍.
ഈ സിനിമകളില്‍ മികച്ച കഥാപാത്രങ്ങളാണ് പാര്‍വതി അവതരിപ്പിക്കുന്നത്.വര്‍ത്തമാനവും ഹലാല്‍ ലവ് സ്റ്റോറിയും റിലീസിന് ഒരുങ്ങുകയാണ്.
