മലയാളത്തിന്റെ പ‌ഞ്ചരത്നങ്ങളിൽ നാല് പേർക്ക് ഒരേദിവസം മാംഗല്യം,​ താലികെട്ടിന് കാരണവരാകാൻ ഉത്രജനും

തിരുവനന്തപുരം: ഒരമ്മയുടെ വയറ്റിൽ ഒന്നിച്ചു പിറന്ന പ‌ഞ്ചരത്നങ്ങളെ ഓർമ്മയില്ലേ?​ കേരളത്തിന്റെ സ്വന്തം പഞ്ചരത്നങ്ങളിൽ നാലുപേർക്ക് ഒരേ ദിവസമാണ് ഇനി മാംഗല്യവും. പോത്തൻകോട് നന്നാട്ടുകാവിൽ ‘പഞ്ചരത്ന’ത്തിൽ പ്രേമകുമാറിന്റെയും രമാദേവിയുടെയും മക്കളായ ഉത്ര, ഉത്രജ, ഉത്തര, ഉത്തമ എന്നിവർ ഒരേദിനത്തിലാണ് പുതുജീവിതത്തിലേക്ക് കടക്കുന്നത്. നാല് സഹോദരിമാരുടെ ഏക കുഞ്ഞാങ്ങള ഉത്രജൻ താലികെട്ടിന് കാരണവരുടെ റോളിൽ മുന്നിൽ നിൽക്കും.ഒരമ്മയുടെ വയറ്റിൽ ഒറ്റ പ്രസവത്തിൽ അഞ്ച് കുഞ്ഞുങ്ങൾ പിറന്നത് കേരളക്കര ഏറെ ആശ്ചര്യത്തോടെയും ആകാംക്ഷയോടെയും ശ്രവിച്ച വാർത്തയായിരുന്നു. അന്ന് മാദ്ധ്യമങ്ങളിൽ ഈ വാർത്ത ഏറെ ശ്രദ്ധനേടി. പിന്നീട് ഇവരുടെ ചോറൂണൂം പേരിടലും, അഞ്ച് കുഞ്ഞുങ്ങളും ഒരുമിച്ച്‌ സ്‌കൂളിൽ ചേർന്നതുമെല്ലാം പലപ്പോഴായി കേരളം കൂടുതൽ അറിഞ്ഞു. എൽ.കെ.ജി മുതൽ പ്ലസ് ടു വരെ ഒരേ സ്‌കൂളിൽ ഒരേ ക്ലാസിലായിരുന്നു അഞ്ചുപേരുടെയും പഠനം.മക്കൾക്ക് പത്ത് വയസ് തികയും മുമ്പാണ് രമാദേവിയുടെ ഭർത്താവിന്റെ അപ്രതീക്ഷിത വേർപാട്. ശേഷം പേസ്മേക്കറിൽ തുടിക്കുന്ന ഹൃദയവുമായി മക്കൾക്കു തണലായി രമാദേവി ജീവിച്ചു. അഞ്ച് മക്കളെയും ചേർത്തുപിടിച്ച് തളരാതെ പിടിച്ചു നിന്ന രമാദേവിയ്ക്ക് സർക്കാർ ജില്ലാസഹകരണ ബാങ്കിൽ ജോലിനൽകി. സഹകരണബാങ്കിന്റെ പോത്തൻകോട് ശാഖയിലാണ് ജോലി നൽകിയത്.മക്കൾക്ക് വേണ്ടി മാത്രമുള്ളതായിരുന്നു രമാദേവി എന്ന മാതാവിന്റെ ജീവിതം. ഇപ്പോൾ മക്കൾക്ക് 24 വയസാകുന്നു. അമ്മയുടെ സ്‌നേഹത്തണലിൽ നിന്ന് പുതുജീവിതത്തിനൊരുങ്ങുകയാണ് നാലു പെൺമക്കളും. ഫാഷൻ ഡിസൈനറായ ഉത്രയ്ക്ക് മസ്കറ്റിൽ ഹോട്ടൽ മാനേജരായ ആയൂർ സ്വദേശി കെ.എസ്. അജിത്കുമാറാണ് വരൻ. കൊച്ചി അമൃത മെഡിക്കൽ കോളേജിൽ അനസ്തീഷ്യാ ടെക്നിഷ്യയായ ഉത്രജയെ ജീവിതസഖിയാക്കുന്നത് കുവൈത്തിൽ അനസ്തീഷ്യാ ടെക്നിഷ്യൻ പത്തനംതിട്ട സ്വദേശി ആകാശ്. ഓൺലൈൻ മാദ്ധ്യമപ്രവർത്തകയായ ഉത്തരയ്ക്ക് കോഴിക്കോട് സ്വദേശിയായ മാദ്ധ്യമപ്രവർത്തകൻ മഹേഷ് താലികെട്ടും. തിരുവനന്തപുരത്ത് സ്വകാര്യ ആശുപത്രിയിൽ അനസ്തീഷ്യാ ടെക്നീഷ്യയായ ഉത്തമയ്ക്ക് മസ്കറ്റിൽ അക്കൗണ്ടന്റായ വട്ടിയൂർക്കാവ് സ്വദേശി വിനീത് താലിചാർത്തും. ഏപ്രിൽ അവസാനം ഗുരുവായൂർ അമ്പലത്തിൽ വച്ചാണ് വിവാഹം.എസ്.എ.ടി. ആശുപത്രിയിൽ നിമിഷങ്ങളുടെ ഇടവേളയിലായിരുന്നു 1995 നവംബറിൽ അഞ്ചുപേരുടെയും ജനനം. പിറന്നത് ഉത്രം നാളിലായതിനാൽ നാളുചേർത്ത് മക്കൾക്ക് പേരിട്ടു. അഞ്ചുമക്കളുടെ പിറവി തൊട്ടിങ്ങോട്ടുള്ള ജീവിതമറിയാൻ കേരളമെന്നും കാത്തിരുന്നിട്ടുണ്ട്.