വെഞ്ഞാറമൂട്: വിവാഹ ചടങ്ങിന് പങ്കെടുത്ത് മടങ്ങവെ കാര്‍ നിയന്ത്രണം വിട്ട് മറിഞ്ഞ് എട്ടു പേര്‍ക്ക് പരിക്ക്. മുളയ്ക്കലത്ത് കാവ് അരശുവിള സ്വദേശികളായ ദീപിക, സുമതി, ഓമന, ഗലിന, ദിനേശ്, ഷിജു, അപ്പു, ദീപു എന്നിവര്‍ക്കാണ് പരിക്കേറ്റത്. ഇന്നലെ രാത്രി പോങ്ങനാട് ആലത്തുകാവ് എസ്.എസ് ഓഡിറ്റോറിയത്തിന് സമീപത്തായിരുന്നു അപകടം. ചെങ്കില്‍കുന്നില്‍ ബന്ധുവിന്റെ മറുവീട് ചടങ്ങില്‍ പങ്കെടുത്തു തിരിച്ച്‌ മടങ്ങവെ സംഭവസ്ഥലത്തു വച്ച്‌ കാര്‍ നിയന്ത്രണം വിട്ട് മറിയുകയായിരുന്നു. പരിക്കേറ്റവരെ നാട്ടുകാരുടെ നേതൃത്വത്തിലാണ് ആശുപത്രികളില്‍ പ്രവേശിപ്പിച്ചത്.
ബ്രേക്കിടുന്നതിനിടെ ഹാന്റില്‍ ലോക്ക് വീണതാകാം അപകടകാരണമെന്നാണ് പൊലീസിന്റെ പ്രാഥമിക നിഗമനം. അപകടത്തില്‍ പരിക്കേറ്റ ദീപിക, സുമതി ഓമന, എന്നിവരെ പാരിപ്പള്ളി മെഡിക്കല്‍ കോളേജ് ആശുപത്രിയിലും മറ്റുള്ളവരെ തിരുവനന്തപുരം മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു. കിളിമാനൂര്‍ പൊലീസ് മേല്‍നടപടികള്‍ സ്വീകരിച്ചു.
